ਤਾਜਾ ਖਬਰਾਂ
ਵੈਸਟਇੰਡੀਜ਼ ਹੱਥੋਂ ਮਿਲੀ ਕਰਾਰੀ ਹਾਰ ਤੋਂ ਬਾਅਦ ਪਾਕਿਸਤਾਨ ਕ੍ਰਿਕਟ ਬੋਰਡ (PCB) ਨੇ ਵਨਡੇ ਕਪਤਾਨ ਮੁਹੰਮਦ ਰਿਜ਼ਵਾਨ 'ਤੇ ਸਖ਼ਤ ਰੁਖ ਅਖਤਿਆਰ ਕਰ ਲਿਆ ਹੈ। ਬੋਰਡ ਵੱਲੋਂ ਜਾਰੀ ਕੀਤੇ ਗਏ ਬਿਆਨ ਨੇ ਸਪੱਸ਼ਟ ਕਰ ਦਿੱਤਾ ਹੈ ਕਿ ਦੱਖਣੀ ਅਫ਼ਰੀਕਾ ਵਿਰੁੱਧ ਆਗਾਮੀ ਵਨਡੇ ਸੀਰੀਜ਼ ਲਈ ਅਜੇ ਤੱਕ ਕਪਤਾਨੀ ਦਾ ਫੈਸਲਾ ਨਹੀਂ ਲਿਆ ਗਿਆ ਹੈ, ਜਿਸ ਤੋਂ ਸਾਫ਼ ਹੈ ਕਿ ਰਿਜ਼ਵਾਨ ਦੀ ਕੁਰਸੀ ਖਿਸਕ ਸਕਦੀ ਹੈ।
ਈਐੱਸਪੀਐੱਨ ਕ੍ਰਿਕਇੰਫੋ ਦੀ ਰਿਪੋਰਟ ਮੁਤਾਬਕ, ਟੀਮ ਦੇ ਮੁੱਖ ਕੋਚ ਮਾਈਕ ਹੇਸਨ ਨੇ ਖ਼ੁਦ ਪੀ.ਸੀ.ਬੀ. ਪ੍ਰਧਾਨ ਮੋਹਸਿਨ ਨਕਵੀ ਨੂੰ ਪੱਤਰ ਲਿਖ ਕੇ ਵਨਡੇ ਟੀਮ ਦੇ ਮਾਮਲਿਆਂ ਅਤੇ ਕਪਤਾਨੀ ਦੀ ਸਮੀਖਿਆ ਲਈ ਤੁਰੰਤ ਬੈਠਕ ਬੁਲਾਉਣ ਦੀ ਮੰਗ ਕੀਤੀ ਸੀ। ਇਸ ਅਪੀਲ 'ਤੇ ਕਾਰਵਾਈ ਕਰਦੇ ਹੋਏ, ਨੈਸ਼ਨਲ ਸਿਲੈਕਸ਼ਨ ਕਮੇਟੀ ਅਤੇ ਸਲਾਹਕਾਰ ਬੋਰਡ ਦੀ ਇੱਕ ਅਹਿਮ ਸਾਂਝੀ ਬੈਠਕ ਸੋਮਵਾਰ ਨੂੰ ਲਾਹੌਰ ਵਿੱਚ ਹੋਣ ਜਾ ਰਹੀ ਹੈ। ਮਾਈਕ ਹੇਸਨ ਖ਼ੁਦ ਇਸ ਬੈਠਕ ਦਾ ਹਿੱਸਾ ਹੋਣਗੇ, ਜਿੱਥੇ ਰਿਜ਼ਵਾਨ ਦੇ ਭਵਿੱਖ 'ਤੇ ਫੈਸਲਾ ਹੋਵੇਗਾ।
ਨਿਰਾਸ਼ਾਜਨਕ ਰਿਕਾਰਡ ਤੇ ਪ੍ਰਦਰਸ਼ਨ
ਰਿਜ਼ਵਾਨ ਦੀ ਕਪਤਾਨੀ ਹੇਠ ਪਾਕਿਸਤਾਨ ਨੇ ਖੇਡੇ ਗਏ 20 ਵਨਡੇ ਮੈਚਾਂ ਵਿੱਚੋਂ 11 ਵਿੱਚ ਹਾਰ ਦਾ ਮੂੰਹ ਦੇਖਿਆ ਹੈ। ਸਿਰਫ਼ ਕਪਤਾਨੀ ਹੀ ਨਹੀਂ, ਪਿਛਲੇ ਕੁਝ ਸਮੇਂ ਤੋਂ ਉਨ੍ਹਾਂ ਦਾ ਨਿੱਜੀ ਬੱਲੇਬਾਜ਼ੀ ਪ੍ਰਦਰਸ਼ਨ ਵੀ ਖ਼ਾਸ ਨਹੀਂ ਰਿਹਾ।
ਜ਼ਿਕਰਯੋਗ ਹੈ ਕਿ ਇਸ ਸਮੇਂ ਪਾਕਿਸਤਾਨ ਤਿੰਨੋਂ ਫਾਰਮੈਟਾਂ ਵਿੱਚ ਵੱਖਰੇ ਕਪਤਾਨਾਂ (ਟੈਸਟ: ਸ਼ਾਨ ਮਸੂਦ, ਵਨਡੇ: ਮੁਹੰਮਦ ਰਿਜ਼ਵਾਨ, ਟੀ20: ਸਲਮਾਨ ਅਲੀ ਆਗਾ) ਦੀ ਨੀਤੀ 'ਤੇ ਚੱਲ ਰਿਹਾ ਹੈ। ਪਰ ਏਸ਼ੀਆ ਕੱਪ ਵਿੱਚ ਸਲਮਾਨ ਅਲੀ ਆਗਾ ਦੀ ਅਗਵਾਈ ਹੇਠ ਟੀਮ ਦੀ ਹਾਰ ਅਤੇ ਹੁਣ ਵਨਡੇ ਵਿੱਚ ਰਿਜ਼ਵਾਨ ਦੀ ਕਾਰਗੁਜ਼ਾਰੀ ਤੋਂ ਬਾਅਦ, ਬੋਰਡ 'ਤੇ ਵੱਡੇ ਬਦਲਾਅ ਦਾ ਦਬਾਅ ਵਧ ਗਿਆ ਹੈ।
Get all latest content delivered to your email a few times a month.
